مين عايز يشتغل في شركة بترول؟؟؟؟؟

سلام عليكم
ازيك يااستاذه رشا
انا عارفه وكنت سمعتك قبل كده بتكلمي عن فرص عمل للخريجين
وكنت بسألك لو تعرفي فى مجال البترول انا خريجه علوم قسم جيولوجيا
انا مش عارفه التواصل يكون ازي الحقيقه
اني ابعت السي في بتاعي مثلا وهو موضح كل حاجه ولا اعمل ايه
لو ممكن تفيديني يبأه جزاكي الله كل خير

شركات البترول …. ناس كتتتتتتتتتتتييييييييييير جدا … عايزه تشتغل في شركات البترول النهارده و بعد لقاء مع احدي العاملات في شركات البترول للاجابة علي اسئلة كل الراغبين في العمل بشركات البترول و كمان الي بيقولو ان شركات البترول بالوسايط وبس …. لا الموضوع مش كده … انا شخصيا أعرف اكثر من شخص اشتغل في شركات بترول بدون واسطه :)

اولا … الفئات الي بيطلبها قطاع البترول …

- خريجي الهندسة و العلوم …. بالاضافة للتخصصات الادارية ودي مش كتير زي الحجات التانية ..

ثانيا … شركات البترول بتاخد مين … عندهم اولويات كالتالي 

- أوائل الدفعات … ( يعني علشان تشتغل في شركة بترول لازم تكون من ال10 الأوائل ).
- حاطط السيرة الذاتية بتاعتك في شركة توظيف…. لانهم بيعتمدوا بشكل كبير علي شركات التوظيف و الشركات الكبيره منها بشكل خاص..
- قدمت عن طريق اعلان من اعلانات الجرائد.
- اشتغلت في قطاع البترول قبل كده … لانهم بياخدو من بعض .

معظم شركات البترول …. شركات عالمية و الي ماسكينها اجانب …. الاجانب معندهمش وسايط …

ثالثا …. اجتياز الأختبارات و المقابلات ….

القطاع دا دونا عن غيره من القطاعات الأخري … المتقدم ليه بيمر بعدد كبير جدا من الأختبارات سواء في مجال التخصص أو في اللغات أو في المهارات الشخصية أو في الذكاء كمان …

طيب … علشان اشتغل في شركة بترول ايه المطلوب ؟؟؟؟؟؟
  1.  تقدير كويس جدا جدا جدا …
  2. مهارات شخصية و لغة و كمبيوتر … برضه كويس جدا …مهو انت هتشتغل مع اجانب اكيد مش هتتعامل معاهم بلغة الاشارة:)
  3. تبعت الCV لشركات التوظيف ودي هتعرف تجيبها عن طريق جوجل …
  4. تقدم بشكل مباشر في الشركات … معظم ادارات الشركات موجوده في المعادي … 
  5. متابعة اعلانات الجرائد …
  6. متابعة اعلانات غرفة التجارة الأمريكية …
افتكر بكده اكون جاوبت علي كيفية العمل بشركة بترول …. عايزه افكركم ان كل شيء و ليه ثمن … و الي عايز يتكحل .. يشتري مكحلة … مش كده و لا ايه؟؟؟؟؟

(2363)

Use Facebook to Comment on this Post

5 Responses so far.

  1. Abdallatif قال:

    اختلف جملة وتفصيلا معك استاذه رشا

    90% بالواسطه
    لا يحتاج الى انترفيوهات كثير
    مش شرط التقدير يكون عالي اطلاقا

  2. Rasha Khalifa قال:

    لو قريت المقال كويس هتلاقي اني عندي اكثر من 3 شخصيات انا اعرفهم و هم اشتغلوا من غير وسايط …. دا غير اني اتكلمت مع احدهم الي هو شغال جوا شركة بترول … هو الي قال ان دي الشروط المتفق عليها في كل شركات البترول :)بس لو انت عايز تفتضل مقتنع انها واسطه خلاص براحتك متعملش اي حاجه من دول و استني الواسطه :)

  3. Abdallatif قال:

    وأنا والد صاحبي مدير احدى شركات البترول المشهوره
    وانا عارف نظام التوظيف فيها

    وبالمناسبه انا مش مستني واسطه في شركة بترول

    انا بس حبيت اصحح الكلام اللي حضرتك قولتيه اللي انا شايفه من جهة نظري خطا

    ومش معنى ان حد اشتغل من غير واسطه يبقى ده قاعده

    لا القاعده هي الواسطه شئت ام ابيت

  4. Anonymous قال:

    انا اتفق مع عبد اللطيف ودة عشان انا ابويا واخويا شغالين فى شركات بترول وعايزة اقولك ان تلات اربع الشركات اللى هية حكومية اللى حضرتك بتقولية دة ينطبق على الأجنبية لكن الحكومى كلة مش وسايط اللى يعرف حد يجيبة وبيشتغل فى ساعتها من غير انترفيو وان شاللة يكون سقط تسعين مرة بس هى معرفة بحد جوة وبس كدة دة الحكومة انا بس حبيت اقولك الجو عامل ازاى ومشكورة على نصايحك القيمة جدااااا

  5. Anonymous قال:

    فعلا يارشا الوساطة هى نمبر وان لانى انا بعرف ناس ولا بتفهم حاجة غير انهم عاملين كام شهادة كمبيوتر ع كام شهادة لغات بالوسطة وع يدى والله العظيم ولا فيهماى مؤهلات من اللى انتى بتقولى عليها غير ان ابوهم فلان بيعرف حضرة الفلان الوسيط واهى كوسة وماشية ف البلد يعنى فى ناس كتير تستحق تشتغل ف البترول ومؤهلات جدا لكن مش معهم الوسطةواهلهم غلابة فبياخدو اللى بيدفعوا فلوس واللى معاه وسطة واللى ابوه فلان ملعون ابو الكوسة والوسطة والمحسوبية علشان فى مصر مصر شباب بنات ورجالة زى الورد مش واخدين فرصتهم منتظرين ايه من بلد رئيسها الفساد ربنا يستر ع مصر والله العظيم ما فى احسن من المصرى ف ذكائه ومستوى ادائه ف الشغل لكن للاسف بلدنا مضيعة حقوقنا ياريت نشوف البلاد التانية بتعمل ايه لولادها حرررررررررررررررررررام

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>